Գարեգին Բ կաթողիկոսն ընդունեց Կանադայի խորհրդարանի Կանադա-Հայաստան բարեկամության խմբի անդամներին

ԷՋՄԻԱԾԻՆ, 16 ՄԱՅԻՍԻ. ԱՐՄԵՆՊՐԵՍ: Գարեգին Բ Ամենայն Հայոց կաթողիկոսն այսօր ընդունել է Կանադայի խորհրդարանի Կանադա-Հայաստան բարեկամության խորհրդարանական խմբի անդամներին՝ Կանադայում Հայաստանի դեսպան Արա Պապյանի ուղեկցությամբ: Ինչպես հայտնեցին Մայր Աթոռի մամլո դիվանից, վեհափառ Հայրապետը ողջունել է երկու երկրների միջեւ առկա բարեկամությունը, նշելով նաեւ Կանադայի իշխանությունների կողմից կանադահայ համայնքի նկատմամբ ունեցած ջերմ վերաբերմունքը, ինչի ականատեսն է եղել նախորդ տարի Կանադա կատարած հովվապետական այցի ընթացքում: Վեհափառ հայրապետը գոհունակությամբ է նշել, որ կանադահայերը իբրեւ երկրի լիարժեք քաղաքացիներ ոչ միայն իրենց մասնակցությունն են բերում Կանադայի հասարակական-քաղաքական կյանքին, այլեւ Հայ եկեղեցու շուրջ համախումբ կարողանում են կազմակերպել իրենց ազգային-եկեղեցական կյանքը: Կանադայի խորհրդարանի անդամ, Կանադա-Հայաստան բարեկամության խորհրդարանական խմբի ղեկավար Սարգիս Ասատուրյանը՝ շնորհակալություն հայտնելով ընդունելության համար, ներկայացրել է հայ-կանադական հարաբերությունների զարգացման հեռանկարները: Խոսվել է նաեւ Կանադայի խորհրդարանի կողմից Հայոց ցեղասպանության ճանաչման հարցի շուրջ: Ինչպես նշել են հյուրերը, խմբի անդամները որոշակի քայլեր են ձեռնարկում այդ ուղղությամբ, եւ առաջիկայում առանձին անդամների կողմից համապատասխան օրինագիծ կներկայացվի խորհրդարան: Վեհափառ Հայրապետը կարեւոր ու էական է նկատել ցեղասպանության ճանաչումը, այն համարելով իբրեւ համամարդկային ողբերգություն, որը նույնչափ դատապարտելի է, որքան՝ ահաբեկչությունը: Զրույցի ընթացքում, ի պատասխան հյուրերի հարցումների, Վեհափառ Հայրապետը խոսել է ետխորհրդային տարիներին Հայ եկեղեցու գործունեության ու առկա դժվարությունների մասին, անդրադարձել աղանդավորության տարածման խնդիրներին: Հանդիպման ավարտին հյուրերը Վեհափառ Հայրապետին են նվիրել Հայաստանում քրիստոնեությունը պետական կրոն հռչակելու 1700-ամյակի առիթով Կանադայում հրատարակված նամականիշի մեծադիր նկարը՝ Կանադա-Հայաստան խորհրդարանական խմբի անդամների ստորագրություններով: