2 րոպեի ընթերցում
ԷՋՄԻԱԾԻՆ, 23 ՄԱՅԻՍԻ. ԱՐՄԵՆՊՐԵՍ: Գարեգին Բ Ամենայն հայոց կաթողիկոսն այսօր ընդունել է ՌԴ Դաշնային Ժողովի Դաշնության խորհրդի նախագահ Սերգեյ Միրոնովին եւ նրա գլխավորած պատվիրակությանը՝ ՀՀ ԱԺ նախագահ Արմեն Խաչատրյանի ուղեկցությամբ: Ինչպես հայտնեցին Մայր Աթոռի մամլո դիվանից, Վեհափառ Հայրապետը՝ ողջունելով հյուրերին, ուրախությյամբ է նշել, որ շարունակվում ու օրավուր զորանում են երկու երկրների միջեւ բարեկամության բարի ավանդույթներն ինչպես պետական, այնպես էլ եկեղեցական մակարդակներում, որ դարավոր այդ բարեկամությանը մշտապես իր նպաստն է բերել նաեւ Մայր Աթոռ Սբ. Էջմիածինը: Նորին Սրբությունն իր մասնավոր ուրախությունն է հայտնելց ռուս ուղղափառ եկեղեցու հետ առկա եղբայրական ջերմ կապերի առիթով, որի արտահայտություններից մեկը կդառնա այն նոր ռուսական եկեղեցին, որ առաջիկայում վեր է հառնելու քաղաքամայր Երեւանում: «Հավատում ենք, որ եկեղեցիների օրհնությունը կարեւոր է մեր երկու ժողովուրդների առաջընթացի եւ բարգավաճման համար եւ այդ գիտակցությամբ էլ փորձում ենք զորակցել մեր երկրներինե,- ասել է Հայոց Հայրապետը: Պրն. Միրոնովը եւս կարեւորել է եկեղեցիների եւ հոգեւոր առաջնորդների դերը ժողովրդի կյանքում: Այս առիթով ռուսաստանցի հյուրը իր շնորհակալությունն է հայտնել Վեհափառ հայրապետին հայ-ռուսական բարեկամության ամրապնդմանը բերած նպաստի, ինչպես նաեւ խաղաղասիրական գործունեության համար: Վերջինիս առիթով պրն. Միրոնովը չափազանց կարեւոր է նկատել ղարաբաղյան հակամարտությունը խաղաղ ճանապարհով լուծելուն ուղղված Հայոց հայրապետի ջանքերը, որին եւ միտված է հայ եւ ադրբեջանցի հոգեւոր առաջնորդների միջեւ սկսված երկխոսությունը: