1 րոպեի ընթերցում
ԷՋՄԻԱԾԻՆ, 17 ԱՊՐԻԼԻ. ԱՐՄԵՆՊՐԵՍ: Ապրիլի 17-ին Ն.Ս.Օ.Տ.Տ. Գարեգին Բ Ամենայն հայոց կաթողիկոսն ընդունեց պաշտոնական այցով Հայաստանում գտնվող Բելառուսի ՆԳ նախարար, գեներալ-մայոր Վլադիմիր Նաումովի գլխավորած պատվիրակությանը՝ ՀՀ ՆԳ նախարար Հայկ Հարությունյանի ուղեկցությամբ: Ինչպես հայտնեցին Մայր Աթոռի մամլո դիվանից, հանդիպման ընթացքում ՀՀ ՆԳ նախարարը Վեհափառ Հայրապետին է ներկայացրել երկու նախարարությունների միջեւ փոխգործակցությունը եւ իր գոհունակությունը հայտնել վերջինի արդյունավետության առնչությամբ: Նորին Սրբությունը ողջունել եւ բարձր է գնահատել երկու երկրների իրավապահ մարմինների համագործակցությունը՝ իբրեւ նախկին խորհրդային հանրապետությունների միջեւ շարունակվող բարեկամության դրսեւորում: Վեհափառ Հայրապետը միաժամանակ կարեւոր է նկատել ներքին գործերի աշխատանքը երկրի կայունության եւ օրինականության պահպանման գործում: Ի պատասխան հյուրերի հարցումների, Հայոց Հայրապետն անդրադարձել է նաեւ Մայր Աթոռ Սբ Էջմիածնի պատմությանն ու ներկայիս գործունեությանը: Հանդիպմանը ներկա էր Արարատյան Հայրապետական թեմի առաջնորդական փոխանորդ Տ. Նավասարդ եպս. Կճոյանը: