1 րոպեի ընթերցում
ԵՐԵՎԱՆ, 15 ԱՊՐԻԼԻ. ԱՐՄԵՆՊՐԵՍ: Գարեգին Բ Ամենայն Հայոց կաթողիկոսն այսօր ընդունել է Ռուսաստանի Դաշնության կապի նախարար Լեոնիդ Ռեյմանի գլխավորած պատվիրակությանը՝ ՀՀ տրանսպորտի եւ կապի նախարար Անդրանիկ Մանուկյանի ուղեկցությամբ: Ինչպես հայտնեցին Մայր Աթոռի մամլո դիվանից, Վեհափառ հայրապետը, ողջունելով հյուրերին, գոհություն է հայտնել հայ եւ ռուս ժողովուրդների դարավոր բարեկամության համար, ուրախությամբ փաստելով նաեւ երկու եկեղեցիների եղբայրական ջերմ հարաբերությունների մասին: Վերջինիս առիթով Վեհափառն անդրադարձել է հայ եւ ռուս ուղղափառ եկեղեցիների միջեւ ներկա համագործակցությանը, մասնավորապես կրթական ոլորտում: Ինչպես նշել է Հայոց հայրապետն, արդեն այս տարվանից ճեմարանավարտ ուսանողները կկարողանան իրենց կրթությունը շարունակել Ռուս ուղղափառ եկեղեցու աստվածաբանական հաստատություններում: ՌԴ կապի նախարարը, կաթողիկոսին տեղեկացնելով Հայաստան այցի նպատակը, շնորհակալություն է հայտնել ընդունելության համար, նշելով, որ Ամենայն Հայոց Հայրապետի հետ հանդիպումը մեծ պատիվ է իր համար: