1 րոպեի ընթերցում
ԷՋՄԻԱԾԻՆ, 1 ՀՈՒԼԻՍԻ. ԱՐՄԵՆՊՐԵՍ: Հուլիսի 1-ին Ն.Ս.Օ.Տ.Տ. Գարեգին Բ Ամենայն հայոց կաթողիկոսն ընդունեց մեկօրյա այցով Հայաստանում գտնվող Վաշինգտոնի արքեպիսկոպոս, Կաթոլիկ օգնության ծառայության (CRS) խորհրդի անդամ կարդինալ Թեոդոր Մաք Քարիկին եւ նրա ուղեկիցներին՝ Կաթոլիկ օգնության ծառայության գործադիր փոխտնօրեն հայր Ուիլյամ Հեդլիին եւ կազմակերպության եվրոպական ու կովկասյան գրասենյակների ղեկավարներին: Հանդիպման ընթացքում, ինչպես հայտնեցին Մայր Աթոռի մամլո դիվանից, հյուրերը Վեհափառ Հայրապետին են ներկայացրել Կաթոլիկ օգնության ծառայության գործունեության հիմնական ուղղությունները Հայաստանում եւ Լեռնային Ղարաբաղում, արտահայտելով իրենց բարի կամեցողությունը տարածաշրջանում խաղաղության հաստատման համար: Նորին Սրբությունը կարեւոր է նկատել կազմակերպության օժանդակությունը հայ ժողովրդին: Վեհափառ Հայրապետն իր շնորհակալությունն է հայտնել նաեւ բարի կամքի դրսեւորման համար, նշելով, որ ղարաբաղյան հակամարտության խաղաղ կարգավորումը հայ ժողովրդի մեծագույն ցանկությունն է: