2 րոպեի ընթերցում
ԷՋՄԻԱԾԻՆ, 9 ՀՈՒԼԻՍԻ. ԱՐՄԵՆՊՐԵՍ: Հուլիսի 9-ին Ն.Ս.Օ.Տ.Տ. Գարեգին Բ Ամենայն Հայոց կաթողիկոսն ընդունեց Եվրոպայի Խորհրդի գլխավոր քարտուղար Վալտեր Շվիմերին: Ըստ Մայր Աթոռի մամլո դիվանի, Վեհափառ Հայրապետը պրն Շվիմերին ներկայացրել է հայոց հոգեւոր կենտրոն՝ Մայր Աթոռ Սբ Էջմիածնի 1700-ամյա պատմությունը, անդրադարձել Հայ եկեղեցու ներկայիս խնդիրներին: Նորին Սրբությունը մասնավորապես իր գոհունակությունն է հայտնել Եվրոպայի Խորհրդին, որ զորակցում է հայ ժողովրդին, նպաստում Հայաստանի տնտեսական եւ սոցիալական զարգացմանը եւ ժողովրդավարության արժեքներն ամրագրում հայոց կյանքում: Զրույցի ընթացքում անդրադարձ է եղել Հայաստանի Հանրապետությունում գործող խղճի ազատության եւ կրոնական կազմակերպությունների մասին օրենքին: Այս առնչությամբ Վեհափառ Հայրապետը նշել է, որ Եվրոպայի Խորհրդի պահանջները սխալ ընկալում ու մեկնաբանություն են ունենում եւ հաճախ դժվարություններ հարուցում Հայ Առաքելական եկեղեցու ազատ գործունեության համար: Հանդիպմանը խոսվել է նաեւ Լեռնային Ղարաբաղի հակամարտության խաղաղ կարգավորման անհրաժեշտության մասին: Վ.Շվիմերն իր երախտագիտությունն է հայտնել ընդունելության համար՝ նշելով, որ քաջատեղյակ է Հայ Առաքելական եկեղեցու գործունեությանը եւ որ անցյալ տարի Եվրոպայի Խորհուրդը եւս տոնախմբել է Հայաստանում քրիստոնեությունը պետական կրոն հռչակման 1700-ամյակը: