1 րոպեի ընթերցում
ԷՋՄԻԱԾԻՆ, 19 ՄԱՐՏԻ. ԱՐՄԵՆՊՐԵՍ: Մարտի 19-ին, Ն.Ս.Օ.Տ.Տ. Գարեգին Բ Ամենայն հայոց կաթողիկոսն ընդունեց Անդրկովկասյան երկրներում պապական նոր նվիրակ, եպիսկոպոս Կլաուդիո Գուջերոտտիին (նստավայրը՝ Թբիլիսի)՝ հայր Զալուսկու ուղեկցությամբ: Ըստ Մայր Աթոռի մամլո դիվանի, Նորին Սրբությունը ողջունել է եպիսկոպոս Գուջերոտտիի նոր նշանակումը եւ ուրախություն հայտնել, որ պապական նվիրակը քաջածանոթ է Հայ ժողովրդի պատմությանը, մշակույթին եւ նրա ներկա կյանքին: Վեհափառ Հայրապետը, անդրադառնալով Հովհաննես Պողոս Երկրորդ Պապի՝ 1700-ամյակի առիթով Հայաստան կատարած այցին, իր գոհունակությունն է հայտնել երկու եկեղեցիների միջեւ առկա եղբայրական հարաբերությունների եւ համագործակցության համար: Պապական նվիրակը, Վեհափառ Հայրապետին փոխանցելով Հովհաննես Պողոս Երկրորդ Պապի ողջույնը, շնորհակալություն է հայտնել ընդունելության համար եւ վստահեցրել, որ պիտի աշխատի ըստ ամենայնի իր նպաստը բերել Հայ եւ Կաթոլիկ եկեղեցիների էկումենիկ կապերի առավել սերտացմանը եւ համագործակցության զորացմանը՝ ի մասնավորի կրթական եւ սոցիալական ասպարեզներում: Վեհափառ Հայրապետն իր բարեմաղթանքներն է հղել Հռոմի Սրբազան Քահանայապետին եւ հաջողություններ մաղթել նորանշանակ պապական նվիրակին իր առաքելության մեջ: