1 րոպեի ընթերցում
ԷՋՄԻԱԾԻՆ, 7 ՄԱՐՏԻ. ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն Հայոց կաթողիկոսը Մարտի 8-ի՝ կանանց տոնի առիթով հետեւյալ շնորհավորական ուղերձն է հղել կանանց: «Մարտի 8-ի տոնական առիթով շնորհավորում ենք բոլոր կանանց եւ Մայր Աթոռ Սուրբ Էջմիածնից բերում հայրապետական մեր օրհնությունը: Մեր մաղթանքն է, որ Աստված մշտապես շնորհազարդի մեր մայրերին ու քույրերին՝ քրիստոնեական առաքինություններով, սիրով ու նվիրումով շարունակելու պահպանել ընտանեկան հարկերի ջերմությունը, իրենց կյանքով ու հավատավոր գործերով ծառայելու ազգային-հասարակական մեր կյանքի զորացմանը եւ նոր ավանդներ բերելու գիտության, մշակույթի ու կրթության ասպարեզներում: Թող Տիրոջ օրհնությամբ սերը, լավատեսությունն ու խաղաղությունը թագավորեն կանանց առաքինազարդ հոգիներում եւ ճառագեն իբրեւ գեղեցկություն ու երջանկություն: Շնորհք, սէր եւ խաղաղութիւն Տեառն մերոյ Յիսուսի Քրիստոսի եղիցին ընդ ձեզ եւ ընդ ամենեսեան. ամէնե: