2 րոպեի ընթերցում
ԷՋՄԻԱԾԻՆ, 19 ՓԵՏՐՎԱՐԻ. ԱՐՄԵՆՊՐԵՍ: Փետրվարի 19-ին Ն.Ս.Օ.Տ.Տ. Գարեգին Բ Ամենայն Հայոց կաթողիկոսին հրաժեշտ տալու նպատակով Մայր Աթոռ Սբ. Էջմիածին այցելեց Սիրիայի Արաբական Հանրապետության դեսպան Համեդ Հասանը, որն ավարտում է դիվանագիտական իր առաքելությունը Հայաստանում: Ինչպես հայտնեցին Մայր Աթոռի մամլո դիվանից, Վեհափառ Հայրապետը բարձր է գնահատել դեսպանի ավելի քան 4-ամյա գործունեությունը մեր երկրում՝ հաստատելով, որ շնորհիվ դեսպանի ջանքերի տեսանելի արդյունքներ են արձանագրվել երկու երկրների եւ ժողովուրդների հարաբերությունների զորացման գործում: «Խորապես զգացված ենք նաեւ այն օգտակարության համար, որ ձեր գործունեության ընթացքում ցուցաբերել եք Հայ եկեղեցու եւ Մայր Աթոռ Սբ. Էջմիածնի նկատմամբե,- ասել է Վեհափառ Հայրապետը՝ մասնավորապես հիշատակելով դեսպանի ջանքերն անցած տարի Հայոց Մեծ եղեռնի տարելիցին Նորին Սրբության Դեր Զոր կատարած ուխտագնացության կազմակերպման գործում: «Հայաստանում գտնվելուս ընթացքում Էջմիածինն ինձ համար մշտապես եղել է կարեւոր ու մեծ նշանակություն ունեցող այն վայրը, ուր ցանկացել եմ լինել: Վերադառնում ենք Սիրիա լավագույն տպավորություններով Ձեր երկրի, ժողովրդի եւ Եկեղեցու մասինե,- ասաց պրն. Համեդ Հասանը՝ իր երախտագիտությունը հայտնելով Վեհափառ Հայրապետի բարձր գնահատանքի եւ ուշադրության համար: Հրաժեշտ տալով դեսպանին՝ Նորին Սրբությունը հաջողություն է մաղթել նրան դիվանագիտական հետագա առաքելության մեջ՝ համոզմամբ, որ այսուհետ եւս այն գործի է դրվելու ի շահ երկու երկրների ու ժողովուրդների բարեկամության: