2 րոպեի ընթերցում
ԷՋՄԻԱԾԻՆ, 5 ՆՈՅԵՄԲԵՐԻ. ԱՐՄԵՆՊՐԵՍ: Նոյեմբերի 5-ին Ն.Ս.Օ.Տ.Տ. Գարեգին Բ Ամենայն հայոց կաթողիկոսն ընդունեց ՌԴ կառավարության նախագահ Միխայիլ Կասյանովին եւ նրա գլխավորած պատվիրակությունը: Ինչպես հայտնեցին Մայր Աթոռի մամլո դիվանից, նորին Սրբությունը, ողջունելով մեծարգո հյուրին, ուրախություն է հայտնել, որ պատմական դարավոր հենքի վրա խարսխված երկու ժողովուրդների բարեկամությունն այսօր արդեն օրեցօր զարգանում է նաեւ պետական մակարդակներով, ինչը կարեւոր նպաստ է բերում երկու երկրների առաջընթացին: Վեհափառ Հայրապետը նշել է նաեւ, որ նման այցելությունները Մայր Աթոռ Սբ Էջմիածին նպաստում են հայ եւ ռուս ժողովուրդների հոգեւոր կապերի սերտացմանը: Իր հերթին Մ.Կասյանովը, շնորհակալություն հայտնելով ընդունելության համար, կարեւորել է եկեղեցու դերը հայ եւ ռուս ժողովուրդների բարեկամության պահպանման եւ զորացման գործում: Վեհափառ Հայրապետը նաեւ իր ցավակցությունն է հայտնել Մ.Կասյանովին ՌԴ մայրաքաղաքի մշակույթի տանը կատարված սոսկալի ահաբեկչության զոհերի կապակցությամբ՝ աղոթելով նրանց հոգիների խաղաղության եւ հանգստության համար: Հանդիպման ավարտին Նորին Սրբությունը Մ.Կասյանովին նվիրել է քրիստոնեության 1700-ամյակի հոբելյանական հուշամեդալ եւ Հայ եկեղեցու գանձերի մասին նկարազարդ ալբոմ: Պրն Կասյանովն ու տկն Կասյանովան եղել են նաեւ Վեհարանի թանգարանում: