2 րոպեի ընթերցում
ԷՋՄԻԱԾԻՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: Հոկտեմբերի 28-ին Ն.Ս.Օ.Տ.Տ. Գարեգին Բ Ամենայն հայոց կաթողիկոսն ընդունել է Հայաստանում պաշտոնական այցով գտնվող Լեհաստանի Հանրապետության Սենատի նախագահ Լոնգին Պաստուշիակին՝ Հայաստանի Հանրապետության Ազգային Ժողովի նախագահ Արմեն Խաչատրյանի ընկերակցությամբ: Ինչպես հայտնեցին Մայր Աթոռի մամլո դիվանից, Վեհափառ Հայրապետը, ողջունելով պատվարժան հյուրին, ուրախություն է հայտնել երկու երկրների միջեւ զարգացող կապերի առնչությամբ: Նորին Սրբությունը առանձնակի կարեւորել է ժողովուրդների բարեկամությունը եւ համոզմունք հայտնել, որ յուրաքանչյուր ազգամիջյան խնդիր իր լուծումը կարող է գտնել միայն սիրո ու փոխհասկացողության մթնոլորտում: Շնորհակալություն հայտնելով ընդունելության համար, Լ.Պաստուշիակը կարեւոր է նկատել եկեղեցու դերը ժողովուրդների միջեւ բարեկամության հաստատման գործում՝ միաժամանակ բարձր գնահատելով նաեւ Հայ եկեղեցու էկումենիկ ոգին: Զրույցի ընթացքում անդրադարձ է եղել անցած տարի Հայաստանում քրիստոնեությունը պետական կրոն հռչակելու 1700-ամյա հոբելյանի առիթով Հռոմի Կաթոլիկ եկեղեցու պետ Հովհաննես Պողոս Բ պապի Հայաստան կատարած այցին: Հյուրերի խնդրանքով Նորին Սրբությունը ներկայացրել է Հայ եկեղեցու ներկայիս գործունեությունը, անդրադարձել է եկեղեցի-պետություն հարաբերություններին: