1 րոպեի ընթերցում
ԷՋՄԻԱԾԻՆ, 10 ՀՈԿՏԵՄԲԵՐԻ, ԱՐՄԵՆՊՐԵՍ: Հոկտեմբերի 10-ին Նոր նախիջեւանի եւ Ռուսաստանի հայոց թեմի առաջնորդ Տ. Եզրաս եպս. Ներսիսյանի ուղեկցությամբ Ն.Ս.Օ.Տ.Տ. Գարեգին Բ Ամենայն հայոց կաթողիկոսի հյուրն էին Մոսկվայում գործող ազգային հանրակրթական, կիրակնօրյա եւ նախակրթական հայկական դպրոցների սաներ եւ ուսուցիչներ, որ ընդգրկված են այս օրերին Հայաստանում գտնվող Ռուսաստանի հայերի միության մեծաթիվ պատվիրակության կազմում: Մոսկվայի 7 նմանատիպ դպրոցներում այսօր ավելի քան 600 հայ երեխա է սովորում, որոնք, ուսուցիչների վկայությամբ, ավարտելով դպրոցը, հաջողությամբ ընդունվում են մոսկովյան տարբեր հեղինակավոր բուհեր: Ըստ Մայր Աթոռի մամլո դիվանի, Նորին Սրբությունը հայրապետական իր օրհնությունն ու պատգամն է փոխանցել երեխաներին, հորդորելով օտար հողում ապրել ազգային ավանդույթներով ու գիտակցությամբ, լինել ազգի արժանավոր զավակներ: Վեհափառ Հայրապետը միաժամանակ իր գնահատանքն է հայտնել ուսուցիչներին ու ծնողներին, որոնք՝ նախանձախնդիր երեխաների ազգային ինքնության պահպանմանը, ամեն ինչ անում են նրանց հայեցի դաստիարակության համար: Հանդիպման ավարտին Վեհափառ Հայրապետն ուրախությամբ ունկնդրել է նաեւ երեխաների գեղեցիկ ասմունքը: