Արամ Ա կաթողիկոսը ցավակցական գիր է հղել ԱՄՆ-ի նախագահ Ջ.Բուշին

ԱՆԹԻԼԻԱՍ, 13 ՍԵՊՏԵՄԲԵՐԻ, ԱՐՄԵՆՊՐԵՍ: Նյու Յորքում եւ Վաշինգտոնում գործադրված ահաբեկչական դաժան գործողությունները դատապարտել է Մեծի Տանն Կիլիկիո Արամ Ա կաթողիկոսը: Նախագահ Բուշին հղած նրա ցավակցական գրում մասնավորապես ասված է, որ բազմահազար անմեղ զոհերի պատճառ դարձած նման ոճրային արարքները դեմ են Ավետարանի ուսմունքին եւ քրիստոնեական ու մարդկային արժեքներին: Վեհափառ Հայրապետը մխիթարանքի խոսքեր է ուղղել զոհերի ընտանիքներին եւ ամերիկյան ժողովրդին: