Արամ Ա-ին այցելել են Ամերիկայի ավետարանական եկեղեցիների ներկայացուցիչները

ԱՆԹԻԼԻԱՍ, 28 ՍԵՊՏԵՄԲԵՐԻ. ԱՐՄԵՆՊՐԵՍ: Բիքýայայի վանքում երեկ Մեծի Տանն Կիլիկիո Արամ Ա. կաթողիկոսին են այցելել Ամերիկայի ավետարանական եկեղեցիների խորհրդի ներկայացուցիչները: Այցելության հիմնական նպատակը, ինչպես տեղեկացնում է կաթողիկոսության մամլո դիվանը, եղել է Ամերիկայի ավետարանական եւ Միջին Արեւելքի եկեղեցիների խորհուրդների առաջիկայում Լիբանանում տեղի ունենալիք համատեղ համաժողովին առընչվող մի շարք հարցերի վերաբերյալ Վեհափառի տեսակետներին ծանոթանալը: Ամերիկայի բոլոր եկեղեցիները ներկայացնող այս միությունը հիմնվել է գրեթե 20 տարի առաջ, նպատակ ունենալով զարգացնել գործակցությունը Միջին Արեւելքի եւ Միացյալ Նահանգների եկեղեցիների միջեւ: Նրա ներկայացուցիչները խնդրել են Վեհափառին՝ մասնակցություն բերել եւ ելույթ ունենալ լիբանանյան հավաքում, նաեւ իր պատգամը հղել եկող տարի Միացյալ Նահանգներում անցկացվելիք համաժողովին: Հանդիպման ժամանակ խոսակցություն է ծավալվել նաեւ ահաբեկչության դեմ պայքարում եկեղեցիների դերի շուրջը: