1 րոպեի ընթերցում
ԷՋՄԻԱԾԻՆ, 28 ՆՈՅԵՄԲԵՐԻ. ԱՐՄԵՆՊՐԵՍ:Այսօր Մայր Աթոռ Ս.Էջմիածնում Ն.Ս.Օ.Տ.Տ. Գարեգին Բ Ամենայն հայոց կաթողիկոսն ընդունեց ՌԴ Լենինգրադի մարզի նահանգապետ Վալերի Սերդյուկովի գլխավորած պատվիրակությանը: Ինչպես հայտնեցին Մայր Աթոռի մամլո դիվանից, Նորին Սրբությունն ուրախություն է հայտնել հայ եւ ռուս ժողովուրդների միջեւ դարավոր կապերի սերտացման եւ ամենատարբեր ոլորտներում փոխհամագործակցության ամրապնդման առնչությամբ: Այս առիթով Վեհափառ Հայրապետն անդրադարձել է նաեւ հայ եւ ռուս եկեղեցիների եղբայրական կապերին: Նա նշել է, որ եկող տարվանից, վերսկսելով փոխհամագործակցությունը կրթական ոլորտում, հայ ճեմարանավարտները կրկին կմեկնեն Զագորսկ՝ խորացնելու աստվածաբանական գիտելիքները Ռուս ուղղափառ եկեղեցու հոգեւոր ակադեմիայում: Վեհափառ Հայրապետը գոհունակությամբ նշել է նաեւ ռուսական կառավարության աջակցությունը Ռուսաստանում բնակվող հազարավոր հայերին, որի լավագույն արտահայտություներից մեկն է Սանկտ Պետերբուրգի ծաղկուն համայնքը: Հանդիպմանը ներկա էր Նոր Նախիջեւանի եւ Ռուսաստանի թեմի առաջնորդ Տ. Եզրաս եպս. Ներսիսյանը: