ՀՀ նախագահ Ռոբերտ Քոչարյանին իր հավատարմագրերն է հանձնել Հայաստանում Վիետնամի Սոցիալիստական Հանրապետության նորանշանակ դեսպան Բույ Դին Զինը
1 րոպեի ընթերցում
ԵՐԵՎԱՆ, 25 ՄԱՐՏԻ, ԱՐՄԵՆՊՐԵՍ: ՀՀ նախագահ Ռոբերտ Քոչարյանին այսօր իր հավատարմագրերն է հանձնել Հայաստանում Վիետնամի Սոցիալիստական Հանրապետության նորանշանակ դեսպան Բույ Դին Զինը (նստավայրը` Մոսկվա): Ինչպես «Արմենպրեսե-ին տեղեկացրին ՀՀ նախագահի մամլո գրասենյակից, հանրապետության նախագահը շնորհավորել է դիվանագետին պաշտոնը ստանձնելու առթիվ եւ հատուկ նշել հայ ու վիետնամցի ժողովուրդների ավանդական ջերմ կապերն ու վերաբերմունքը: Ընդգծելով երկու երկրների քաղաքական հարաբերությունների բարձր մակարդակը, միջազգային կազմակերպությունների շրջանակում ձեւավորված արդյունավետ համագործակցությունը` կողմերը կարեւորել են տնտեսական կապերի զարգացումը` պատրաստակամություն հայտնելով կոնկրետ քայլեր ձեռնարկել այդ ուղղությամբ: Նրանք առաջնային են համարել փոխայցելությունների կազմակերպումը, գործարար շփումների ակտիվացումը, բազմակողմ տեղեկատվության փոխանակումը, ինչը թույլ կտա ճշտել համագործակցության հնարավոր բնագավառները: