1 րոպեի ընթերցում
ԵՐԵՎԱՆ, 19 ՓԵՏՐՎԱՐԻ, ԱՐՄԵՆՊՐԵՍ: ՀՀ նախագահ Ռոբերտ Քոչարյանն այսօր ընդունել է ԱՊՀ Գլխավոր քարտուղար Ալեքսանդր Լեբեդեւին: Նա ղեկավարում է նախագահական ընտրություններին ԱՊՀ դիտորդական առաքելությունը: Ինչպես «Արմենպրեսե-ին տեղեկացրին ՀՀ նախագահի մամլո գրասենյակից, Ալեքսանդր Լեբեդեւը նշել է, որ իրենք դիտարկում իրականացնում են ողջ հանրապետությունում, դիտորդները եղել են տարբեր ընտրատեղամասերում, զրուցել հանձնաժողովի անդամների եւ թեկնածուների վստահված անձանց հետ: Նրա գնահատմամբ, ընտրություններն ընթանում են գործող ընտրական օրենսդրության նորմերին համապատասխան: ՀՀ նախագահն ասել է, որ իշխանությունները տրամադրված են անցկացնել նորմալ ընտրություններ եւ ձեռնարկել են դրա համար անհրաժեշտ բոլոր միջոցառումները: Երկուստեք համոզմունք է հայտվել, որ ընտրությունները հաջող ընթացք կունենան, կանցնեն հանգիստ, առանց միջադեպերի: Զրուցակիցներն անդրադարձել են նաեւ փետրվարի 22-ին Մոսկվայում կայանալիք ԱՊՀ անդամ երկրների ղեկավարների ոչ պաշտոնական գագաթնաժողովին: