Ժաննա Անդրեասյանը մասնակցել է Եվրոպայի խորհրդի անդամ երկրների սպորտի նախարարների 19-րդ համաժողովին
1 րոպեի ընթերցում
Հայաստանի կրթության, գիտության, մշակույթի և սպորտի նախարար Ժաննա Անդրեասյանը Մոնակոյում մասնակցել է Եվրոպայի խորհրդի անդամ երկրների սպորտի նախարարների 19-րդ համաժողովին, որն անցկացվել է «Ավելի անվտանգ և առողջ սպորտ բոլոր երեխաների համար» խորագրի ներքո։
«Արմենպրես»-ի փոխանցմամբ՝ այս մասին հաղորդագրություն է տարածել ՀՀ կրթության, գիտության, մշակույթի և սպորտի նախարարությունը։
Ողջունելով մասնակիցներին՝ ԿԳՄՍ նախարարն ընդգծել է, որ սպորտի իրական արժեքը չափվում է ոչ միայն նվաճումներով, մեդալներով և ռեկորդներով, այլև յուրաքանչյուր երեխայի առողջությանը, զարգացմանը, արժանապատվությանն ու բարեկեցությանը նպաստելու կարողությամբ։
«Սպորտը կրթության, առողջ ապրելակերպի խթանման, սոցիալական ներառման և համերաշխության ամրապնդման կարևոր միջոց է: Այս արժեքները կարող են լիարժեք իրացվել միայն այն դեպքում, երբ յուրաքանչյուր երեխա հնարավորություն ունի զբաղվելու սպորտով այնպիսի միջավայրում, որտեղ իրեն զգում է անվտանգ, հարգված և պաշտպանված»,֊նշել է նախարարը։