Քաղաքաշինության կոմիտեում քննարկվել են ներդրումային ծրագրերի իրականացման շրջանակում քաղաքաշինական ընթացակարգերին առնչվող հարցեր
2 րոպեի ընթերցում
Քաղաքաշինության կոմիտեում «Ներդրումների աջակցման կենտրոն» հիմնադրամի գործադիր տնօրեն Գոհար Աբաջյանի և հիմնադրամի ներկայացուցիչների մասնակցությամբ քննարկվել են ներդրումային ծրագրերի իրականացման շրջանակում քաղաքաշինական ընթացակարգերին առնչվող հարցեր։ Անդրադարձ է կատարվել ծրագրերի իրականացման տարբեր փուլերում ծագող խնդիրներին և համատեղ լուծումների մշակմամբ խոչընդոտների վերացման հնարավորություններին։
Ինչպես «Արմենպրես»-ը տեղեկանում է Կոմիտեի տարածած հաղորդագրությունից, կառույցի նախագահ Եղիազար Վարդանյանը տեղեկացրել է, որ կոմիտեի առաջնահերթություններից են քաղաքաշինական ընթացակարգերի պարզեցումը և թվայնացումը, որոնք կնպաստեն ներդրումային ծրագրերի առավել արդյունավետ իրականացմանը։ Մասնավորապես՝ ներդրվել է պարզեցված ընթացակարգ հանրության գերակա շահ ճանաչված հողամասերի նպատակային և գործառնական նշանակությունների փոփոխության համար։ Դիտարկվում է նաև ներդրումային ծրագրերի դեպքում պարզեցված մոտեցման հնարավորությունը։ Իսկ առաջիկայում նախատեսվում է գործարկել նպատակային նշանակության փոփոխության թվային հարթակ։
Գոհար Աբաջյանը կարևորել է թվային հարթակի միջոցով ներդրողների համար հստակ, կանխատեսելի և թափանցիկ ընթացակարգերի ապահովումը՝ ընդգծելով ներդրումային ծրագրերի իրականացման ընթացքում ծագող խնդիրների օպերատիվ լուծման և պետական կառույցների միջև արդյունավետ համագործակցության նշանակությունը։
Հանդիպմանը կարևորվել է նաև գյուղատնտեսական նշանակության հողերի պահպանումը, միաժամանակ նշվել է, որ բնակավայրերի գլխավոր հատակագծերի և գոտևորման նախագծերի թվայնացման շնորհիվ ներդրողներն ու քաղաքացիները հստակ պատկերացում կունենան հողամասերի կառուցապատման հնարավորությունների և սահմանափակումների վերաբերյալ։
Որոշվել է համագործակցել՝ ոլորտային բարեփոխումների մշակման ընթացքում հիմնադրամի առաջարկները հաշվի առնելու և ներդրումային ծրագրերի իրագործման ընթացքում ծագող հարցերն ուսումնասիրելու ուղղությամբ։