2 րոպեի ընթերցում
Ավելի քան 60 000 հրշեջներ, զինծառայողներ, ոստիկաններ և այլ ծառայությունների աշխատակիցներ Ինդոնեզիայում մասնակցում են հրդեհաշիջման ցամաքային աշխատանքներին, հայտնել է երկրի նախարարների կաբինետի քարտուղար Թեդի Ինդրա Վիջայան: «Արմենպրես»-ի փոխանցմամբ՝ այս մասին հաղորդում է Antara լրատվական գործակալությունը։
Պաշտոնյայի խոսքով՝ հիմնական ուշադրությունը կենտրոնացած է Կենտրոնական Կալիմանտանի և Հարավային Սումատրայի նահանգների վրա։ Նա նաև տեղեկացրել է, որ ցամաքային խմբերը հասցնում են մարել օրվա ընթացքում կրակի ընդգրկած տարածքի ավելի քան 80%-ը։ Նախարարների կաբինետի քարտուղարի գնահատմամբ՝ իրավիճակն արդեն բարելավվել է Ռիաուի, Արևմտյան Կալիմանտանի, Ջամբիի և Հարավային Կալիմանտանի նահանգներում։ Նա նշել է, հրդեհների դեմ պայքար է մղվում նաև օդից՝ ուղղաթիռների և ինքնաթիռների միջոցով։
Ինդոնեզիան արդեն մի քանի շաբաթ է, ինչ պայքարում է երկրի մի շարք մասերում բռնկված հրդեհների դեմ։ Հրդեհներից ծխամշուշը հասել է Մալայզիա և Սինգապուր՝ հանգեցնելով օդի աղտոտվածության ռեկորդային մակարդակների։ 2026 թ. օգոստոսին Ինդոնեզիայի իշխանությունները ժամանակավորապես փակել են ինը ազգային պարկ՝ անտառային հրդեհների բարձր վտանգի պատճառով: