2 րոպեի ընթերցում
Իրանի արտաքին գործերի նախարարության խոսնակ Էսմայիլ Բաղային Թեհրանում կայացած մամուլի ասուլիսի ժամանակ նշել է, որ Իրանը դեռևս վերանայում է Վաշինգտոնի պատասխանն իր յոթ կետանոց առաջարկին, և երկու կողմերի միջև հաղորդագրությունները միջնորդների միջոցով շարունակվում են։ «Արմենպրես»-ի փոխանցմամբ՝ այս մասին հայտնում է IRNA գործակալությունը։
Բաղայիի խոսքով՝ ՄԱԿ-ի Գլխավոր ասամբլեայի շրջանակներում քննարկված առաջարկը ներառում է Իրանի օրինական պահանջները, այդ թվում՝ ծովային շրջափակման վերացումը, բոլոր ճակատներում պատերազմի դադարեցումը և իրանական ակտիվների ապասառեցումը։ Նա հավելել է, որ այս հարցերը ներառված են եղել նախկինում համաձայնեցված փոխըմբռնման հուշագրում։
Բաղային նշել է, որ Իրանը կփոխանցի իր դիրքորոշումը միջնորդներին, երբ վերանայումն ավարտվի՝ ընդգծելով, որ ԱՄՆ նոր պատժամիջոցները նույնպես պետք է վերացվեն, և Վաշինգտոնը պետք է դադարեցնի իր միջամտողական և ագրեսիվ գործողությունները։
Խոսնակը նաև շեշտել է, որ Պակիստանը և Կատարը մնում են Թեհրանի և Վաշինգտոնի միջև հիմնական միջնորդները։
Բաղային հերքել է ԱՄՆ նախագահ Դոնալդ Թրամփի պնդումներն առ այն, որ Հորմուզի նեղուցով էներգետիկ հոսքը վերադարձել է մինչպատերազմյան մակարդակին՝ նշելով, որ նեղուցում անվտանգությունը չի վերականգնվի, քանի դեռ Վաշինգտոնը պահպանում է Իրանի դեմ ուղղված ռազմածովային շրջափակումն ու տնտեսական պատժամիջոցները։