Հիմնանորոգվում է Վարդենիս քաղաքի Լեռնագործների փողոցը

Գեղարքունիքի մարզի Վարդենիս քաղաքի Լեռնագործների փողոցը հիմնանորոգվում է։ 

Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչությունից, Վարդենիսի Լեռնագործների փողոցի շինաշխատանքներն ընթանում են Մ-10-Սևան-Մարտունի-Վարդենիս-ՀՀ սահման միջպետական նշանակության ճանապարհի 9 կիլոմետրանոց հատվածի հիմնանորոգման ծրագրի շրջանակներում, որի  պայմանագրային արժեքը կազմում է 1 միլիարդ 977 միլիոն դրամ։ Այն ամբողջությամբ հատկացվում է պետբյուջեի միջոցներից։

Լեռնագործների փողոցը  հիմնանորոգվում է  1300 գծամետր երկարությամբ և 14500 քմ մակերեսով։  

Այժմ  իրականացվում են բազալտե եզրաքարերի տեղադրման, մայթերի ասֆալտապատման, դիտահորերի բարձրացման, ինչպես նաև շուրջ 14 500 քմ մակերեսի հիմքի և ասֆալտբետոնե ծածկի կառուցման աշխատանքներ։

Ծրագրի ավարտին ճանապարհը կկահավորվի անհրաժեշտ ճանապարհային նշաններով և գծանշմամբ։

Շինարարական աշխատանքներին տեղում ծանոթանալու նպատակով օրերս Լեռնագործների փողոցի շինհրապարակ է այցելել Գեղարքունիքի մարզպետ Կարեն Սարգսյանը։