Մետրոյի «Աջափնյակ» կայարանի ծրագրի կառավարման ընկերությունների նախնական ցանկն արդեն կա. Ավինյան
2 րոպեի ընթերցում
Երևանի Աջափնյակ վարչական շրջանում մետրոյի կայարանի կառուցման ծրագրի ուղղությամբ առաջընթաց կա․ Երևանի քաղաքապետարանն ունի նախնական ցանկ և պատկերացում՝ ծրագրի կառավարման համար ընտրվելիք ընկերությունների և շինարարների մասով:
«Արմենպրես»-ի հաղորդմամբ՝ այս մասին լրագրողների հետ զրույցում ասաց Երևանի քաղաքապետ Տիգրան Ավինյանը։
Անդրադառնալով մետրոյի «Աջափնյակ» կայարանի ծրագրին և հարցին՝ արդյոք այդ ուղղությամբ առաջընթաց կա, այդ թվում՝ ռուսական կողմի հետ քննարկումների առումով, քաղաքապետը նշեց,որ կա առաջընթաց, կա քննարկում։ «Մենք ունենք նախնական ցանկ՝ նախագծի կառավարման համար ընտրվելիք ընկերությունների, որոնց հրավեր ենք ուղարկելու՝ որոշակի մրցութային տրամաբանությամբ ընտրություն կատարելու համար։
Այսինքն՝ մեզ պետք է նմանատիպ նախագծի կառավարիչ, մեզ պետք է տեխնիկական վերահսկողություն՝ իր ինժեներներով, և վերջում նոր մեզ պետք է հենց բուն մետրոյի կառուցողը: Կարելի է ասել՝ մենք կառավարչի մասով որոշակի ցանկ արդեն ունենք, կառուցողների մասով ևս որոշակի պատկերացումներ ունենք»,-ասաց քաղաքապետը:
Խոսելով մետրոյի վագոնների արդիականացման ծրագրի մասին, Ավինյանը նշեց, որ ընթացիկ արդիականացման ծրագիրը ֆինանսավորվում է ՀՀ կառավարության կողմից։
«Ֆինանսների նախարարությունը պարբերաբար հատկացնում է միջոցներ՝ հավելյալ վագոններ արդիականացնելու, վերագործարկելու համար։ Այս տարի նույնպես ունենք այդ ծրագիրը։ Հաստատվել է մետրոյի ամբողջական արդիականացման ծրագիրը, որը նշանակում է՝ մետրոյի բոլոր վագոնները, բոլոր ռելսերը պետք է փոխարինվեն»,-նշեց նա:
Նա ընդգծեց, որ այդ աշխատանքները կտևեն մոտավորապես երկու-երեք տարի։ «Բայց դա չի նշանակում, որ ընթացիկ աշխատանքները դադարելու են»,-եզրափակեց քաղաքապետը: