Ինչ է մնում, երբ հիշողությունները սկսում են խամրել․ երևանյան բեմ կբարձրանա «Քանի չեմ մոռացել» պարային ներկայացումը
2 րոպեի ընթերցում
«ԹԷԱՏՐՈՆ» կատարողական արվեստների միջազգային ֆրանկոֆոն փառատոնն իր սոցիալական ծրագրի շրջանակում սեպտեմբերի 17-ին Երևանում Հովհաննես Թումանյանի անվան տիկնիկային թատրոնում կներկայացնի Ամալիա Սալի «Քանի չեմ մոռացել» պարային ներկայացումը։
«Արմենպրես»-ի փոխանցմամբ՝ «Քանի չեմ մոռացել»-ը ներկայացում է հիշողության, ընտանեկան կապերի և սերունդներին միավորող փխրուն, բայց հզոր թելերի մասին։
«Ի՞նչ է մնում, երբ հիշողությունները սկսում են խամրել, և ինչպե՞ս են սերը, հոգատարությունը, հումորն ու ապրումակցումը շարունակում միավորել մարդկանց։ Ամալիա Սալը պատմում է հենց այդ մասին՝ համադրելով ժամանակակից և քաղաքային պարը թատերական արտահայտչամիջոցների հետ»,– ասված է փառատոնի կազմակերպիչների տարածած հաղորդագրության մեջ։
Ներկայացումը ծերացման և Ալցհայմերի հիվանդության թեմաներին անդրադառնում է նրբորեն և լուսավոր հայացքով՝ հիշեցնելով, որ նույնիսկ երբ բառերն անհետանում են, մարմինը շարունակում է հիշել, հաղորդակցվել և սիրել։
Ներկայացումը նախատեսված է ՀՀ առողջապահության նախարարության «Առողջ երկարակեցություն» ծրագրի և «Ալցհայմերի խնամք Հայաստան» կազմակերպության «Հիշողության և աջակցության սրճարաններ» ծրագրի մասնակիցների համար։
Փառատոնի գլխավոր հովանավորն է Երևանի քաղաքապետարանը։ Աջակիցներն են Հայաստանում Ֆրանսիայի դեսպանություն և Ֆրանսիական ինստիտուտը, ՀԲԸՄ Ֆրանսիայի մասնաճյուղը։
Փառատոնն իրագործվում է նաև ՀՀ առողջապահության նախարարության, Հիվանդությունների վերահսկման և կանխարգելման ազգային կենտրոնի և «Ալցհայմերի խնամք Հայաստան» կազմակերպության համագործակցությամբ։