Սևանի սանիտարական և բնապահպանական բարեփոխումների ծրագրի վերաբերյալ հանրային լսում՝ Գավառի համայնքապետարանում
1 րոպեի ընթերցում
Գեղարքունիքի մարզի Գավառի համայնքապետարանում կայացել է Սևանի սանիտարական և բնապահպանական բարեփոխումների (SSERP) ծրագրի վերաբերյալ հանրային լսում, որը վարել է համայնքի ղեկավարի առաջին տեղակալ Գրիգոր Դաշտոյանը։
Ինչպես «Արմենպրես»-ին տեղեկացրին Գավառի համայնքապետարանի աշխատակազմից, հանրային լսմանը մասնակցել են Գեղարքունիքի մարզպետի,Գավառի համայնքապետարանի աշխատակազմերի աշխատակիցներ, հասարակական կազմակերպությունների, խոցելի խմբերի ներկայացուցիչներ, այլ շահագրգիռ անձինք։
Ծրագիրը ֆինանսավորվում է Ասիական Զարգացման բանկի կողմից և իրականացվելու է Գավառ քաղաքում, Կարմիրգյուղ, Նորատուս և Գանձակ բնակավայրերում։
Ծրագրի նպատակն է աջակցել Սևանա լճի ավազանում սանիտարական ենթակառուցվածքների և կեղտաջրերի կառավարման համակարգերի բարելավմանը՝ նպաստելով շրջակա միջավայրի պահպանությանը, հանրային առողջության բարելավմանը և բնակչության կենսապայմանների բարելավմանը։
Հանրային լսման ընթացքում փորձագետների կողմից ներկայացվել են ծրագրի նպատակները, հիմնական ուղղությունները, նախատեսվող գործունեությունը, ակնկալվող արդյունքները, բնապահպանական և սոցիալական հետևանքները։
Ծավալվել է քննարկում, մասնակիցներին հետաքրքրող հարցերին տրվել են պարզաբանումներ։