2 րոպեի ընթերցում
Վիետնամի արտաքին գործերի նախարար Լե Հոայ Չունգը շնորհավորել է Արարատ Միրզոյանին՝ Հայաստանի արտաքին գործերի նախարարի պաշտոնում վերանշանակվելու առթիվ։
«Արմենպրես»-ն այս մասին տեղեկացել է ՀՀ արտաքին գործերի նախարարությունից.
«Անցած տարիների ընթացքում Վիետնամի և Հայաստանի միջև բազմապլան համագործակցությունն անշեղորեն ամրապնդվել և զարգացել է, ընդ որում երկու արտաքին քաղաքական գերատեսչությունների արդյունավետ փոխգործակցությունը չափազանց կարևոր դեր է խաղացել:
Խորապես համոզված եմ, որ երկու կողմերի ջանքերի և վճռականության շնորհիվ Վիետնամի և Հայաստանի միջև ավանդական բարեկամության և համագործակցության բարի հարաբերությունները, ինչպես նաև մեր նախարարությունների միջև փոխգործակցությունը դառնում են ավելի սերտ ու արգասաբեր՝ համապատասխանելով երկու երկրների ժողովուրդների շահերին և ավանդ ներդնելով տարածաշրջանում ու ամբողջ աշխարհում խաղաղության և կայունության ամրապնդման գործում»,- ասված է Վիետնամի ԱԳ նախարարի ուղերձում:
Հայաստանի կառավարությունը օգոստոսի 2-ին հրաժարական էր ներկայացրել, քանի որ այդ օրը մեկնարկել էր հունիսի 7-ին Հայաստանում կայացած խորհրդարանական ընտրությունների արդյունքներով ձևավորված խորհրդարանի առաջին նստաշրջանը։ Հայաստանի Սահմանադրության համաձայն՝ նոր խորհրդարանի առաջին նստաշրջանի մեկնարկի օրը ՀՀ կառավարությունը պետք է հրաժարական ներկայացնի ՀՀ նախագահին։ Վարչապետ Նիկոլ Փաշինյանն օգոստոսի 2-ին ստորագրել էր ՀՀ կառավարության հրաժարականի դիմումը, որն ուղարկվել էր ՀՀ նախագահի աշխատակազմ։ Նախագահը հաստատել էր Կառավարության հրաժարականը, որից հետո արդեն նոր ձևավորված խորհրդարանում մեծամասնություն ստացած «Քաղաքացիական պայմանագիր» կուսակցությունը վարչապետի պաշտոնում ներկայացրել էր Նիկոլ Փաշինյանի թեկնածությունը, ինչի հիման վրա էլ ՀՀ նախագահը Փաշինյանին վերանշանակել էր վարչապետի պաշտոնում։
Օգոստոսի 3-ին վարչապետ Նիկոլ Փաշինյանի առաջարկությամբ ՀՀ նախագահ Վահագն Խաչատուրյանը նշանակել էր նաև նախարարներին և փոխվարչապետերին։ Արարատ Միրզոյանը վերանշանակվել էր ՀՀ արտաքին գործերի նախարարի պաշտոնում։