1 րոպեի ընթերցում
Համայնքային ոստիկանության Մեղրիի բաժնի ծառայողները Շվանիձոր գյուղի վարչական տարածքում ապօրինի ընդերքօգտագործման դեպք են բացահայտել։
Ինչպես տեղեկացնում է «Արմենպրես»-ը, ՆԳՆ ոստիկանությունից հայտնում են, որ օգոստոսի 10-ին կատարված ստուգման ընթացքում տարածքում հայտնաբերվել են ընկերություններից մեկին պատկանող էքսկավատոր և մեկ այլ ընկերության երեք բեռնատար՝ բեռնված ավազակոպճային հանքանյութով։
Տարածքում եղել է շուրջ 5,5 հազար խորանարդ մետր հանքանյութ, որը նախատեսվում էր տեղափոխել Վարդանիձորում գտնվող երրորդ ընկերության արտադրամաս՝ մշակման նպատակով։
Բեռնատարները տեղափոխվել են պահպանվող հատուկ տարածք, իսկ էքսկավատորը վերցվել է հսկողության։ Կազմված փաստաթղթերը ներկայացվել են Սյունիքի մարզային քննչական վարչություն։
Հանգամանքները պարզվում են։