1 րոպեի ընթերցում
Սննդամթերքի անվտանգության տեսչական մարմինը կասեցրել է Վայոց ձորի մարզի Վայք համայնքի Հերհեր բնակավայրում անհատ ձեռնարկատեր Սերոբ Արամյանին պատկանող «Լիլիթ» ապրանքանիշի գազավորված ոչ ալկոհոլային ըմպելիքների արտադրամասի արտադրական գործունեությունը։
Ինչպես «Արմենպրես»-ը տեղեկանում է Սննդամթերքի անվտանգության տեսչական մարմնի տարածած հաղորդագրությունից, տեսչական մարմնի տեսուչները արտադրամասում հայտնաբերել են օրենսդրությամբ սահմանված սանիտարահիգիենիկ պահանջների մի շարք խախտումներ։
Մասնավորապես՝ արտադրամասի հատակների և պատերի մակերևույթները պատրաստված չեն եղել անջրանցիկ, լվացվող և ախտահանվող նյութերից։ Առաստաղները չեն համապատասխանել սահմանված պահանջներին՝ չեն կանխարգելել կեղտի կուտակումը, բորբոսի առաջացումը և մասնիկների թափվելու վտանգը։
Խախտումներ են արձանագրվել նաև դռների վիճակում․ դրանք եղել են անհարթ և պատրաստված չեն եղել չներծծող նյութերից։ Բացի այդ, սննդամթերքի հետ անմիջական շփման մեջ գտնվող սարքավորումները չեն պահվել նորոգ և բարվոք վիճակում։
Հայտնաբերված խախտումները վերացնելու համար սահմանվել է ժամկետ։