Կրիշտիանու Ռոնալդուն ամուսնացել է Ջորջինա Ռոդրիգեսի հետ

Ֆուտբոլի աստղ Կրիշտիանու Ռոնալդուն ամուսնացել է իր երկար տարիների զուգընկեր, մոդել և ինֆլուենսեր Ջորջինա Ռոդրիգեսի հետ։ Ամուսնական արարողությունը տեղի է ունեցել Պորտուգալիայում։

«Արմենպրես»-ի փոխանցմամբ՝ պորտուգալացի հարձակվողն իր Instagram-ի և Facebook-ի էջերում հրապարակել է լուսանկար, որում իր և կնոջ ձեռքերն են՝ ամուսնական մատանիներով։

Պորտուգալական լրատվամիջոցները սա անվանում են «տարվա հարսանիքը»՝ նշելով, որ զույգն ամուսնացել է օգոստոսի 11-ին Լիսաբոնի մոտ գտնվող Կասկայշ ափամերձ քաղաքում, և որ արարողությանը ներկա են եղել նրանց հինգ երեխաները։

Զույգը միասին է արդեն 10 տարի։ Նրանք հանդիպել են Մադրիդի Gucci խանութում, որտեղ աշխատում էր Ռոդրիգեսը։ Այդ ժամանակ Ռոնալդուն խաղում էր իսպանական «Ռեալ Մադրիդ» ակումբում։

Նրանք իրենց նշանադրության մասին հայտնել էին 2025 թ. օգոստոսի 11-ին։

Ռոնալդուն իր կարիերայի ընթացքում դարձել է գրեթե 1000 գոլի հեղինակ։ Վերջերս նա մասնակցել է իր վեցերորդ Աշխարհի առաջնությանը՝ սահմանելով տղամարդկանց եզրափակիչ խաղերում մասնակցության ռեկորդ, որը նա կիսում է արգենտինացի ֆուտբոլիստ Լիոնել Մեսսիի հետ։