Արևմտյան Եվրոպայում շոգի ալիքների հետևանքով ջերմաստիճանի նոր ռեկորդ է սահմանվել

Այս ամառ Արևմտյան Եվրոպան պատուհասած շոգի ալիքները գերազանցել են հունիս-հուլիս ամիսների համար սահմանված միջին ջերմաստիճանի նախկին ռեկորդը, որը գրանցվել էր 2022 թվականին։ Ինչպես հաղորդում է «Արմենպրես»-ը՝ վկայակոչելով Associated Press լրատվական գործակալությունը, այս մասին հայտնել է Եվրոպական կլիմայական «Կոպեռնիկոս» ծառայությունը։

Ծայրահեղ շոգը սկսվել է դեռևս մայիսին և տարածաշրջանում նպաստել խոշոր անտառային հրդեհների բռնկմանը, երկարատև երաշտին և մի շարք երկրներում ջերմաստիճանի ազգային ռեկորդների սահմանմանը։ Կանխատեսումների համաձայն՝ շոգի հետևանքով կարող են գրանցվել նաև հազարավոր մահվան դեպքեր։

Կլիմայական վիճակագրության համաձայն՝ 2026 թվականն առայժմ աշխարհում երրորդ ամենաշոգ տարին է՝ զիջելով միայն 2024 և 2025 թվականներին։ Սակայն գիտնականները նշում են, որ պատկերը դեռ կարող է փոխվել։

«Կոպեռնիկոս»-ի տվյալներով՝ անցած ամիս գրանցվել է հուլիսի համար երբևէ արձանագրված ծովի մակերևույթի ամենաբարձր միջին ջերմաստիճանը՝ սեզոնային սառույցից զերծ օվկիանոսների հատվածում։

Արևմտյան Եվրոպայում հունիս-հուլիս ժամանակահատվածի միջին ջերմաստիճանը հասել է ռեկորդային 21.62°C-ի։