1 րոպեի ընթերցում
Իսրայելի պաշտպանության բանակի զինվորականները հուլիսի 29-ին վերադարձրել են Իսրայելի երեք քաղաքացիների, որոնք նախորդ օրը Հերմոն լեռան մոտակայքում հատել են սիրիական սահմանը։
Ինչպես հաղորդում է «Արմենպրես»-ը, վկայակոչելով «ՏԱՍՍ»-ը, այս մասին հայտնում է Իսրայելի պաշտպանության բանակի մամուլի ծառայությունը։
«Երեկ Իսրայելի երեք քաղաքացի ժամանել են Հերմոն լեռան շրջան և հատել Սիրիայի հետ սահմանը։ Այսօր ավելի վաղ դեպքի վայր ժամանած Իսրայելի պաշտպանության բանակի ստորաբաժանումները հայտնաբերել են այդ քաղաքացիներին և վերադարձրել Իսրայելի տարածք», - ասվում է հաղորդագրության մեջ։ Մամուլի ծառայությունը նշել է, որ կալանավորված անձինք հետագա գործողությունների համար հանձնվել են Իսրայելի ոստիկանությանը։
Իսրայելի պաշտպանության բանակը շեշտել է, որ խստորեն դատապարտում է այդ միջադեպը, որը վտանգում է տվյալ տարածքում գործող ԻՊԲ զորքերի անվտանգությունը։ «Իսրայելի իրավապահ մարմինները պարտավոր են պատասխանատվության ենթարկել մեղավորներին և կանխել նման միջադեպերի կրկնությունը, որոնք քրեորեն պատժելի արարք են»,-ասվում է տեքստում։