1 րոպեի ընթերցում
Թուրքիայի արտաքին գործերի նախարար Հաքան Ֆիդանը հայտարարել է, որ մոտ ապագայում մտադիր է այցելել Կիև՝ Ուկրաինայում հակամարտության կարգավորման բանակցային գործընթացն ակտիվացնելու նպատակով։
«Արմենպրես»-ի հաղորդմամբ՝ այս մասին Թուրքիայի ԱԳ նախարարը հայտարարել է TRT Haber պետական հեռուստաալիքին տված հարցազրույցում։
«Մոտ ապագայում, պարոն նախագահի (խմբ․՝ Թուրքիայի նախագահ Ռեջեփ Թայիփ Էրդողան) հանձնարարությամբ, մենք կայցելենք Կիև՝ որպես գործընթացի շարունակություն, որպեսզի Ուկրաինայի շուրջ բանակցություններին լրացուցիչ խթան հաղորդենք»,-ասել է Ֆիդանը։
Նա վստահեցրել է, որ այցը կլինի Անկարայի դիվանագիտական ջանքերի մի մասը, որոնք ուղղված են հակամարտության կողմերի միջև բանակցային գործընթացի առաջմղմանը։
Նրա բնորոշմամբ՝ Թուրքիան շարունակում է կապեր պահպանել և՛ Մոսկվայի, և՛ Կիևի հետ և անհրաժեշտ է համարում դիվանագիտական երկխոսությունը պահպանել՝ կայուն հրադադարի և հետագա խաղաղ կարգավորման հասնելու համար։