Ուկրաինան և Գերմանիան համաձայնագիր են ստորագրել BARS ԱԹՍ-ների համատեղ արտադրության վերաբերյալ
2 րոպեի ընթերցում
Ուկրաինան և Գերմանիան ՆԱՏՕ-ի գագաթնաժողովի շրջանակներում BARS անօդաչու թռչող սարքերի (ԱԹՍ) համատեղ արտադրության մասին համաձայնագիր են ստորագրել։ «Արմենպրես»-ի փոխանցմամբ՝ այս մասին հայտնել է Ուկրաինայի արտաքին գործերի նախարար Անդրեյ Սիբիհան X միկրոբլոգի իր էջում։
«Գերմանիայի պաշտպանության դաշնային նախարար Բորիս Պիստորիուսի հետ մենք ստորագրեցինք BARS անօդաչու թռչող սարքերի համատեղ արտադրության իրականացման համաձայնագիր», - գրել է նա։
Սիբիհան նաև ընդգծել է, որ համաձայնագիրը կնքվել է Ուկրաինայի պաշտպանության նախարարության և Գերմանիայի դաշնային պաշտպանության նախարարության համատեղ ջանքերի արդյունքում՝ «Կառուցեք Ուկրաինայի հետ» նախաձեռնության շրջանակներում։
«Գերմանական կողմը կֆինանսավորի անօդաչու թռչող սարքերի արտադրությունը նախագծի առաջին փուլում, և արտադրված բոլոր սարքավորումները կմատակարարվեն Ուկրաինայի պաշտպանության ուժերին», - նշված է գրառման մեջ։
Հուլիսի 7-ին Նիդեռլանդների վարչապետ Ռոբ Յետենը և Ուկրաինայի նախագահ Վոլոդիմիր Զելենսկին ՆԱՏՕ-ի գագաթնաժողովի շրջանակներում ստորագրել են անօդաչու թռչող սարքերի տեխնոլոգիաների վերաբերյալ համագործակցության համաձայնագիր։
Բացի այդ, նույն օրն Ուկրաինան Էստոնիայի հետ ստորագրել է անօդաչու թռչող սարքերի տեխնոլոգիաների վերաբերյալ համագործակցության համաձայնագիր։
Ուկրաինայի նախագահ Վոլոդիմիր Զելենսկին հայտարարել է նաև Դանիայի հետ անօդաչուների ոլորտում պայմանագիր կնքելու մասին՝ նշելով, որ այն «ավելի մեծ հնարավորություններ կբացի համատեղ պաշտպանական արտադրության, փորձի փոխանակման և զենքի արտահանման թափանցիկության» համար։