Գործնական քննության երկարացված ժամկետը կգործի նաև այն անձանց համար, որոնց 1 տարին դեռ չի լրացել. Մարանդյան

Տեսական քննությունը նախկինում հանձնած անձինք ևս կկարողանան օգտվել գործնական քննությունը 2 տարվա ընթացքում հանձնելու հնարավորությունից, եթե նրանց համար նախկինում սահմանված 1 տարվա ժամկետը դեռ չի լրացել։ «Արմենպրես»-ի հաղորդմամբ՝ այս մասին մամուլի ասուլիսի ժամանակ հայտնեց ՆԳՆ իրավաբանական վարչության պետ Ռուսլան Մարանդյանը՝ անդրադառնալով վարորդական վկայականների տրամադրման կարգում կատարված փոփոխություններին։

Նախկին կարգավորմամբ տեսական քննությունը դրական հանձնելուց հետո անձին տրվում էր 1 տարի՝ գործնական քննությունը հանձնելու համար։ Եթե այդ ընթացքում գործնական քննությունը չէր հանձնվում, տեսական քննության արդյունքը համարվում էր ուժը կորցրած։

Մարանդյանի խոսքով՝ տեսական քննության արդյունքի ուժը կորցնելու կարգավորումը չի փոխվել, սակայն գործնական քննությունը հանձնելու ժամկետը երկարացվել է։

«Տեսական քննությունը հանձնելուց հետո անձը հնարավորություն կունենա 2 տարվա ընթացքում հանձնելու գործնական քննությունը։ Կառավարության որոշումն արդեն հրապարակված է և հունիսի 4-ից ուժի մեջ է մտել»,-ասաց նա։

ՆԳՆ իրավաբանական վարչության պետը նշեց, որ փոփոխությունը կատարվել է նաև քաղաքացիներից ստացված ազդակների հիման վրա։ Նրա խոսքով՝ Հայաստանում ձևավորվում է այն մոտեցումը, երբ քաղաքացիները նախ մասնակցում են դասընթացների և հաշվառման-քննական մարմին են ներկայանում այն ժամանակ, երբ իրենց գնահատմամբ արդեն պատրաստ են գործնական քննությանը։

Մարանդյանը նաև ընդգծեց, որ մինչև Կառավարության որոշման ուժի մեջ մտնելը տեսական քննությունը հանձնած անձինք կարող են օգտվել 2 տարվա ժամկետից։

Պարեկային ծառայության պետի տեղակալ Արման Չիլինգարյանն իր հերթին պարզաբանեց, որ երկարացված ժամկետը կտարածվի միայն այն անձանց վրա, որոնց համար նախկին 1 տարվա ժամկետը դեռ չէր ավարտվել։

«Եթե 1 տարին դեռևս չի լրացել, այդ բոլոր անձանց համար ժամկետը կդառնա 2 տարի։ Բայց այն դեպքերում, երբ 1 տարվա ժամկետն արդեն իսկ լրացել է որոշման ուժի մեջ մտնելու օրը, այն այլևս չի կարող երկարացվել, որովհետև ավարտված ժամկետը չի կարող երկարացվել»,- նշեց Չիլինգարյանը։