Էրդողանն Իսրայելի ղեկավարությանը մեղադրել է Մերձավոր Արևելքում խաղաղություն հաստատելու ջանքերը տապալելու փորձերի մեջ
1 րոպեի ընթերցում
Թուրքիայի նախագահ Ռեջեփ Թայիփ Էրդողանը հայտարարել է, որ Մերձավոր Արևելքում խաղաղության և կայունության հաստատումը տեղի կունենա՝ չնայած Իսրայելի գործողություններին։
Ինչպես հաղորդում է «Արմենպրես»-ը, թուրքական «Անադոլու» լրատվական գործակալության փոխանցմամբ ՝ Թուրքիայում իշխող «Արդարություն և զարգացում» կուսակցության խորհրդարանական խմբակցության նիստում ելույթ ունենալով՝ Էրդողանը պնդել է, որ Իսրայելը փորձում է խոչընդոտել տարածաշրջանում խաղաղության գործընթացը։
Թուրքիայի նախագահը Իսրայելի ներկայիս ղեկավարությանը մեղադրել է տարածաշրջանում լարվածության պահպանման և խաղաղության հաստատմանն ուղղված ջանքերը տապալելու փորձերի մեջ։
Էրդողանը նաև հայտարարել է, որ Իրանի շուրջ վերջին զարգացումները ցույց են տվել Թուրքիայի աճող ազդեցությունը տարածաշրջանային և միջազգային գործընթացներում։
«Իրանական ճգնաժամի ընթացքում տեղի ունեցած իրադարձությունները բոլորին ցույց տվեցին, թե որքան հզոր պետություն է Թուրքիայի Հանրապետությունը»,- ասել է նա։
Թուրքիայի նախագահը վստահեցրել է, որ Անկարան կշարունակի աջակցել Իրանի շուրջ ճգնաժամի կայուն և երկարաժամկետ կարգավորմանն ուղղված դիվանագիտական ջանքերին։