Սևան քաղաքի երեք փողոց հիմնանորոգվում է

Գեղարքունիքի մարզի Սևան քաղաքի Ելենովկա, Բարեկամություն, Աշոտ Երկաթ փողոցներում ՀՀ կառավարության կողմից իրականացվող սուբվենցիոն ծրագրերի շրջանակներում արդեն տրվել է հիմնանորոգման աշխատանքների մեկնարկը։

Ինչպես «Արմենպրես»-ին տեղեկացրին Սևանի համայնքապետարանի աշխատակազմից, վերոնշյալ երեք փողոցներն ընդգրկում են 660 գծամետր երկարություն և շուրջ 4 հազար քմ մակերես:

Սևանի Ելենովկա, Բարեկամություն, Աշոտ երկաթ փողոցների հիմնանորոգման ծրագրի պայմանագրային արժեքը կազմում է 231 միլիոն 478 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Սևանի համայնքապետարանը։

Շինաշխատանքների կապալառու կազմակերպությունը «Ճան Շին» ՍՊԸ-ն է:  Շինարարական աշխատանքները, որոնք նախատեսված են ավարտել 2026 թվականի ընթացքում, ներառում են շինարարական մի շարք բաղադրիչներ։