ՀՀ ԱԳ փոխնախարարն ու ՄԱԿ Զբոսաշրջության կազմակերպության գլխավոր քարտուղարը վերահաստատել են համագործակցությունն առավել զարգացնելու պատրաստակամությունը
1 րոպեի ընթերցում
Մադրիդում անցկացվող Ֆեմինիստական դիվանագիտության 5-րդ նախարարական համաժողովի շրջանակներում Հայաստանի արտաքին գործերի նախարարի տեղակալ Ռոբերտ Աբիսողոմոնյանը հանդիպել է ՄԱԿ Զբոսաշրջության կազմակերպության գլխավոր քարտուղար Շեյխա Նասեր Ալ Նուեյսի հետ:
Ինչպես «Արմենպրես»-ը տեղեկանում է ՀՀ ԱԳ նախարարության տարածած հաղորդագրությունից, ի շարունակություն այս տարի մարտին Անդորրայում տեղի ունեցած հանդիպման՝ զրուցակիցները վերահաստատել են Հայաստանի և ՄԱԿ Զբոսաշրջության կազմակերպության միջև առկա համագործակցությունն առավել զարգացնելու փոխադարձ պատրաստակամությունը և քննարկել են ձեռքբերված պայմանավորվածությունների կատարման ընթացքը:
Ռոբերտ Աբիսողոմոնյանը կարևորել է Կազմակերպության կողմից ՀՀ կարողությունների զարգացմանն ուղղված միջոցառումների անցկացումը: Ընդգծվել է բժշկական զբոսաշրջության ոլորտում Հայաստանում առկա ներուժի լիարժեք կիրարկման կարևորությունը:
Անդրադառնալով Հայաստանում հյուրընկալվելիք ՄԱԿ-ի Կենսաբանական բազմազանության մասին կոնվենցիայի կողմերի 17-րդ համաժողովին` կարևորվել է ՄԱԿ Զբոսաշրջության կազմակերպության ակտիվ ներգրավվածությունը և համատեղ նախաձեռնությունների իրականացումը։