2 րոպեի ընթերցում
Հայկական գյուղատնտեսական արտադրանքի նկատմամբ սահմանափակումների կիրառումը սխալ քայլ է, քանի որ այն մարդկանց տրամադրում է Եվրասիական տնտեսական միության դեմ։ «Արմենպրես»-ի հաղորդմամբ՝ «Իզվեստիա»-ի լրագրողի հարցին ի պատասխան այս մասին ասել է ՀՀ վարչապետ Նիկոլ Փաշինյանն՝ անդրադառնալով Հայաստանի գյուղմթերքի արտահանման նկատմամբ սահմանափակումներին։
«Կարծում եմ՝ դրանք սխալ քայլեր են, որովհետև մարդկանց տրամադրում են ԵԱՏՄ-ի դեմ։ Իսկ ես, որպես ԵԱՏՄ բարձր պաշտոն զբաղեցնող պաշտոնյա, դա համարում եմ խնդիր։ Բայց մենք բոլոր խնդիրները կլուծենք»,-ասել է վարչապետը։
Լրագրողի հարցին, թե արդյոք Հայաստանը ընդունո՞ւմ է գյուղատնտեսական արտադրանքի հետ կապված, մասնավորապես՝ բուսասանիտարական վերահսկողության ոլորտում առկա խնդիրների գոյությունը, Փաշինյանը պատասխանել է, որ առանձին ընկերությունների դեպքում նման խնդիրներ կարող են լինել։
«Առանձին ընկերությունների մոտ խնդիրներ կան, և այդպես է ամենուր, նաև՝ Ռուսաստանում։ Բայց, ընդհանուր առմամբ, մենք ունենք շատ լավ վերահսկողության համակարգ, և շարունակում ենք բարելավել մեր գյուղատնտեսական արտադրանքի որակը»,-նշել է նա։
«Ռոսսելխոզնադզոր»-ը հայտարարել է, որ 2026 թվականի հունիսի 2-ից ժամանակավոր սահմանափակումներ է մտցնում Հայաստանից բալի, կեռասի, ծիրանի, սալորի, դեղձի, նեկտարինի և խաղողի ներմուծման նկատմամբ՝ պատճառաբանելով դա բուսասանիտարական պահանջների խախտումներով։ Նախկինում ռուսական գերատեսչությունը սահմանափակել էր նաև Հայաստանից մի շարք բանջարեղենի ներմուծումը։