1 րոպեի ընթերցում
Գեղարքունիքի մարզի Սևան համայնքի Դդմաշեն գյուղում հանդիսավորությամբ բացվել է նորակառույց մանկական խաղահրապարակ։
Ինչպես «Արմենպրես»-ին տեղեկացրին Սևանի համայնքապետարանի աշխատակազմից, 2025 թվականին համայնքում իրականացված մասնակցային բյուջետավորման գործընթացի շրջանակներում, որին Սևան համայնքը միացել էր կամավոր հիմունքներով, Դդմաշեն բնակավայրում կառուցվել է մանկական նոր խաղահրապարակ:
Դդմաշեն բնակավայրում խաղային հրապարակի կառուցման և կահավորման համար Սևան համայնքի բյուջեից հատկացվել է 5 միլիոն 220 հազար դրամ:
Դդմաշենի մանկական խաղահրապարակը կահավորվել է նախադպրոցական և կրտսեր տարիքին համապատասխան խաղամիջոցներով, տեղադրվել են նստարաններ, կառուցվել է ցայտաղբյուր, տնկվել են ծառեր, տարածքը ցանկապատվել է:
«Դդմաշեն բնակավայրի փոքրիկներն այսուհետ ունեն ազատ ժամանցի կազմակերպման և անցկացման անվտանգ, հարմարավետ, ապահով, հաճելի միջավայր, որն առաջարկել են բնակիչները, ստացել է ձև և բովանդակություն համայնքի կողմից և համայնքային միջոցներով»,-ներկայացրին Սևանի համայնքապետարանի աշխատակազմից: