1 րոպեի ընթերցում
Հայաստանի տարածքում մայիսի 27-ին և մինչև մայիսի 28-ի երեկո կպահպանվի տաք, առանց տեղումների եղանակ։ Սակայն մայիսի 28-ի ուշ երեկոյան ժամերից հանրապետությունը կհայտնվի Սև ծովից ներթափանցող ցիկլոնի ազդեցության գոտում, ինչի հետևանքով մայիսի 29-30-ին սպասվում են ամպրոպային բնույթի կարճատև անձրևներ և օդի ջերմաստիճանի էական նվազում։
«Արմենպրես»-ի հաղորդմամբ՝ այս մասին տեղեկացրել է Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրենի տեղակալ Գագիկ Սուրենյանը։
Նրա փոխանցմամբ՝ այսօր ողջ օրվա ընթացքում և վաղը մինչև երեկո Հայաստանը գտնվելու է հարավ-արևմտյան արևադարձային տաք օդային հոսանքների ազդեցության գոտում, ինչի արդյունքում հանրապետության ամբողջ տարածքում սպասվում է տաք և առանց տեղումների եղանակ։
Օդի ջերմաստիճանը մայիսի 27-ին և 28-ին կբարձրանա 2-4 աստիճանով։
Գագիկ Սուրենյանի տեղեկացմամբ՝ մայիսի 29-30-ն ընկած ժամանակահատվածում հյուսիս-արևմուտքից Հայաստան կներթափանցեն արկտիկական ցուրտ օդային հոսանքներ, ինչի հետևանքով օդի ջերմաստիճանը կնվազի 8-10 աստիճանով։
Նրա խոսքով՝ մայիսի 31-ից հունիսի 1-ն ընկած ժամանակահատվածում տեղումները կրկին կդադարեն, իսկ օդի ջերմաստիճանը աստիճանաբար կբարձրանա։