2 րոպեի ընթերցում
ՆԱՏՕ-ի գլխավոր քարտուղար Մարկ Ռյուտեն ողջունել է ԱՄՆ նախագահի հայտարարությունը լրացուցիչ 5000 զինվոր Լեհաստան ուղարկելու մասին: «Արմենպրես»-ի փոխանցմամբ՝ այս մասին հաղորդում է Reuters գործակալությունը:
«Իհարկե, ես ողջունում եմ այդ հայտարարությունը։ Մեր զինվորական հրամանատարները մշակում են բոլոր մանրամասները, բայց, իհարկե, ես ողջունում եմ դա», - ասել է Ռյուտեն Շվեդիայում դաշինքի արտգործնախարարների հանդիպմանը ժամանելիս:
Նա միևնույն ժամանակ հավելել է, որ միտվածությունը, միևնույն է, այն է, որ Եվրոպան ավելի ուժեղ լինի և պաշտպանության հարցում ավելի քիչ կախված լինի Միացյալ Նահանգներից:
«Եկեք հստակեցնենք՝ մեր ընտրած ուղին հետևյալն է՝ ավելի ուժեղ Եվրոպա և ավելի ուժեղ ՆԱՏՕ՝ ապահովելով, որ ժամանակի ընթացքում, քայլ առ քայլ մենք ավելի պակաս կախված լինենք միայն մեկ դաշնակցից՝ Միացյալ Նահանգներից, ինչպես եղել է այսքան երկար ժամանակ, որպեսզի նրանք նույնպես հնարավորություն ունենան ավելի շատ շրջվելու դեպի այլ առաջնահերթություններ, որոնք նույնպես մեր շահերից են բխում։ Բայց, իհարկե, ես շատ ողջունում եմ երեկվա հայտարարությունը», - ասել է Ռյուտեն:
Ավելի վաղ ԱՄՆ նախագահ Դոնալդ Թրամփը հայտարարել էր, որ լրացուցիչ 5000 զինվոր է ուղարկում Լեհաստան՝ այդ որոշումը պայմանավորելով այդ երկրի նախագահ Կարոլ Նավրոցկու հետ լավ հարաբերություններով։