Սև ծովում մեկնարկել են ռազմածովային վարժանքներ ՆԱՏՕ-ի վեց երկրի մասնակցությամբ

ՆԱՏՕ-ի վեց երկրի ռազմածովային ուժերի նավաստիներ մասնակցում են Սև ծովում մեկնարկած Opex-26 (Operational Experimentation, գործառնական թեստավորում) միջազգային վարժանքներին՝ ինքնավար ծովային անօդաչուներով։ «Արմենպրես»-ի փոխանցմամբ՝ այս մասին հայտնել է Ռումինիայի ռազմածովային ուժերի շտաբը։

Միջազգային վարժանքները, որոնց խնդիրն է ծովային անօդաչուների փորձարկումները, տեղի են ունենում մայիսի 18-29 Մանգալիայի ռազմական նավահանգստում և Սև ծովի մի շարք շրջաններում, նշված է հաղորդագրության մեջ։

Վարժանքներին մասնակցում են Բուլղարիան, Կանադան, Պորտուգալիան, Ռումինիան, ԱՄՆ-ն և Թուրքիան, ինչպես նաև ծովային անօդաչուներ արտադրող քաղաքացիական ընկերությունների ներկայացուցիչներ։

«Զորավարժությունների ընթացքում կմշակվի վերջրյա և ստորջրյա անօդաչու համակարգերի կիրառումը, ինչպես նաև կանցկացվեն մարտավարական մանևրներ՝ ուղղված մասնակիցների միջև համագործակցության ամրապնդմանը», - նշված է Ռումինիայի ռազմածովային ուժերի շտաբի հաղորդագրության մեջ:

Ռումինիայի կողմից վարժանքներում գործի են դրված «Գրիգորե Անտիպա» նավը՝ ջրասուզորդներով, «Կապիտան Կոնստանտին Դումիտրեսկու» ականորս նավը և երկու հիդրոգրաֆիկ նավ։