Մեծ Մասրիկում ընթանում են մշակույթի տան կառուցման աշխատանքներ

Գեղարքունիքի մարզի Վարդենիս համայնքի Մեծ Մասրիկ գյուղում մարտից ընթանում են մշակույթի տան կառուցման շինարարական աշխատանքները։

Ինչպես «Արմենպրես»-ին տեղեկացրին Վարդենիսի համայնքապետարանի աշխատակազմից, Մեծ Մասրիկի մշակույթի տան նոր շենքի կառուցման աշխատանքները մեկնարկել են դեռևս 2019 թվականից՝ 150 միլիոն դրամ պայմանագրային արժեքով, որի 45 տոկոսը եղել է ՀՀ կառավարության, 55 տոկոսը՝ Մեծ Մասրիկի համայնքապետարանի մասնաբաժինը։ Ծրագիրն իրականացվել է 2 փուլով՝ ընդգրկելով 2019-2020 թվականները, սակայն այն մնացել է անավարտ՝ պայմանավորված 2020 թվականի համավարակով ու 44-օրյա պատերազմով։ Մեծ Մասրիկի մշակույթի տան նոր շենքի կառուցման շինարարությունն ավարտելու նպատակով ծրագիրը ՀՀ կառավարության կողմից հաստատվել է 2025 թվականին, շինարարական մրցույթը հայտարարվել նույն տարվա նոյեմբերին, իսկ շինաշխատանքների մեկնարկը տրվել է 2026 թվականի մարտին։

Շինարարության պայմանագրային արժեքը կազմում է 76 միլիոն դրամ, որի 45 տոկոսը հատկացնում է ՀՀ կառավարությունը, 55 տոկոսը՝ Վարդենիսի համայնքապետարանը։

Շինարարական աշխատանքներն իրականացնող «Սպիտակ Բազե» ՍՊԸ տնօրեն Վարդան Երանոսյանի տեղեկացմամբ՝ 2026 թվականի մայիսի 14-ի դրությամբ արդեն իրականացվել է աշխատանքների շուրջ 70 տոկոսը՝ տեղադրվել է շենքի տանիքը, ընթանում են ներքին հարդարման աշխատանքներ, առկա են բոլոր նախադրյալները՝ շինարարությունն առաջիկա ամիսներին ամբողջությամբ ավարտին հասցնելու համար։

Ծրագրի իրականացման արդյունքում Մեծ Մասրիկ գյուղը կունենա արդի չափորոշիչներին համապատասխան մշակույթի տուն։