Փաշինյանը մտավախություն չունի, որ 102-րդ ռազմաբազան կգործադրվի ՀՀ-ում ձերբակալված ՌԴ քաղաքացիներին պաշտպանելու համար
2 րոպեի ընթերցում
Հայաստանի վարչապետ, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը մտավախություն չունի, որ Գյումրիում գտնվող ռուսական 102-րդ ռազմաբազան գործի կդրվի Հայաստանում ձերբակալված Ռուսաստանի Դաշնության քաղաքացիներին պաշտպանելու համար:
«Արմենպրես»-ի փոխանցմամբ՝ այս մասին Փաշինյանն ասաց լրագրողների հետ զրույցում՝ անդրադառնալով ՌԴ պետդումայի կողմից ընդունված օրենքին, որով ՌԴ նախագահին իրավունք է վերապահվում ռուսական բանակն օգտագործել արտերկրում ՌԴ քաղաքացիներին պաշտպանելու համար, եթե նրանք ենթարկվեն ձերբակալման կամ քրեական հետապնդման այնպիսի օտարերկրյա դատարանների կողմից, որոնց իրավասությունը Մոսկվան չի ճանաչում:
«Մտավախություն չկա, որովհետև, անկախ նրանից, թե ինչ օրենքներ են գործում Ռուսաստանում, 102-րդ ռազմաբազան պետք է գործի Հայաստանի օրենսդրության շրջանակում և Հայաստանի իրավազորության ներքո»,- ասաց Փաշինյանը:
Ռուսաստանի Պետդուման մայիսի 13-ին ընդունել է օրենքի նախագիծ, որով ՌԴ նախագահին իրավունք է վերապահվում ՌԴ զինված ուժերն օգտագործել արտերկրում ՌԴ քաղաքացիների պաշտպանության համար, եթե նրանք ենթարկվեն ձերբակալման կամ քրեական հետապնդման այնպիսի օտարերկրյա դատարանների կողմից, որոնց իրավասությունը Մոսկվան չի ճանաչում։ Օրենքն ուղղված է «ոչ բարեկամական պետությունների» դեմ և լրացնում է գործող նորմերը, որոնք թույլ են տալիս ՌԴ նախագահին զորքեր մտցնել ՌԴ շահերին սպառնացող վտանգի դեպքում։