1 րոպեի ընթերցում
Հայաստանի վարչապետ, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը Հայաստանում այլևս հնարավոր չի համարում ընտրակաշառքով հարց լուծելը:
«Արմենպրես»-ի փոխանցմամբ՝ այս մասին Փաշինյանը հայտնեց լրագրողների հետ զրույցում՝ անդրադառնալով Հակակոռուպցիոն կոմիտեի կողմից պարբերաբար հրապարակվող հաղորդագրություններին՝ խորհրդարանական ընտրություններին ընդառաջ մասնակից քաղաքական ուժերի կողմից ընտրակաշառք տալու կամ խոստանալու դեպքերի վերաբերյալ:
«Երևույթները մտահոգիչ են, պետք է լրջորեն պայքարենք ընտրակաշառքների դեմ: Թույլ տվեք համոզմունք արտահայտել, որ ընտրակաշառքով Հայաստանում այլևս հնարավոր չէ հարց լուծել, հնարավոր է մի քանի ձայն փախցնել»,- ասաց Փաշինյանը:
Նիկոլ Փաշինյանը նշեց, որ ընտրակաշառքի դեմ լավ են պայքարում իրավապահ մարմինները, հատկապես՝ Հակակոռուպցիոն կոմիտեն:
Հիշեցնենք, որ Հակակոռուպցիոն կոմիտեն պարբերաբար հաղորդագրություններ է հրապարակում առավելապես «Ուժեղ Հայաստան» կուսակցության ներկայացուցիչների կողմից ընտրակաշառք տալու կամ խոստանալու դեպքերի վերաբերյալ՝ հրապարակելով նաև ձայնագրություններ։