Գևորգ Պապոյանի խոսքով՝ ադրբեջանական բենզինի շնորհիվ է, որ Հայաստանում բենզինի գները ավելի շատ չեն բարձրացել

Հայաստանի էկոնոմիկայի նախարար Գևորգ Պապոյանը վստահեցնում է՝ եթե Հայաստանն Ադրբեջանից բենզին և դիզվառելիք ներմուծած չլիներ, հիմա բենզինի գները Հայաստանում մի քանի հարյուր դրամով ավելի բարձր կլինեին։

«Արմենպրես»-ի հաղորդմամբ՝  Պապոյանն այդ մասին ասաց Աշխատանքի և աշխատավորների համերաշխության միջազգային օրվան նվիրված շքերթի ժամանակ լրագրողների հետ ճեպազրույցում՝ շեշտելով, որ բենզինի գներն ամբողջ աշխարհում են բարձրացել։

«Աշխարհի շատ երկրներում բենզինի գինը 2-3 անգամ է թանկացել, իսկ Հայաստանում՝ տոկոսներով, այնպես որ պետք է շարունակենք հնարավորինս ավելի շատ դիվերսիֆիկացիան պահել, որ աշխարհաքաղաքական ցնցումները մեզ վրա հնարավորինս քիչ ազդեցություն ունենան»,-ասաց նախարարը։

Հայաստանը սկսել է Ադրբեջանից բենզին ներկրել 2025 թվականի դեկտեմբերից։ Օրերս ադրբեջանական ԶԼՄ-ները, հիմնվելով պետական մարմինների տրամադրած տվյալների վրա, հայտնել էին, որ 2026 թվականի ապրիլի 14-ի դրությամբ Ադրբեջանից Հայաստան է ուղարկվել  ընդհանուր  առմամբ  6312 տոննա դիզվառելիք, 979 տոննա ԱԻ-92 տեսակի բենզին և 2955 տոննա ԱԻ-95 տեսակի բենզին։