Նեթանյահուի փաստաբանը և Իսրայելի գլխավոր դատախազը հրավիրվել են նախագահական գրասենյակ՝ քննարկելու վարչապետի դեմ քրեական գործերը

Իսրայելի նախագահ Իցհակ Հերցոգի իրավական խորհրդական Միխալ Ցուկը գլխավոր դատախազին և վարչապետ Բենիամին Նեթանյահուի փաստաբանին հրավիրել է նախագահական նստավայր՝ վարչապետի քրեական դատավարության վերաբերյալ համաձայնությունների հասնելու նպատակով։ «Արմենպրես»-ի փոխանցմամբ՝ այս մասին հաղորդում է The Times of Israel-ը։

Հերցոգի իրավական խորհրդականն Իսրայելի գլխավոր դատախազին և Նեթանյահուի փաստաբանին ուղղված նամակում նշել է, որ «պայմանավորվածությունը» կբխի երկրի շահերից՝ հավելելով, որ նախագահը մի քանի անգամ հրապարակավ արտահայտել է այս դիրքորոշումը։

Ավելի վաղ Հերցոգը բացառել էր Նեթանյահուի ներման խնդրանքի բավարարումն այս փուլում, իսկ իսրայելական լրատվամիջոցները հաղորդել էին, որ նախագահը հակված չէ հակառակվել Արդարադատության նախարարության ներման վարչության խորհրդին, որը հայտարարել էր, որ վարչապետի խնդրանքը չի համապատասխանում ներման չափանիշներին։

«Այս գործընթացը ներկայացնում է միայն նախնական քայլ, նախքան նախագահը կքննարկի իր ներման լիազորությունների կիրառումը: Կողմերին խնդրել են ներկայանալ հնարավորինս շուտ», - ասվում է նախագահական գրասենյակի հայտարարության մեջ:

Ցուկը նամակում նշել է, որ «նախագահը եզրակացրել է, որ վարչապետի դեմ ներկայացված ներման լիազորության կիրառումը քննարկելուց առաջ անհրաժեշտ է նախ սպառել կողմերի միջև բանակցությունների բոլոր հնարավորությունները՝ (Նեթանյահուի դեմ գործերի վերաբերյալ) համաձայնության հասնելու համար»։

Նա խնդրել է պատասխանել հրավերին մինչև մայիսի 3-ը։

Հերցոգը հետաձգել է Նեթանյահուին ներում շնորհելը, չնայած ԱՄՆ նախագահ Դոնալդ Թրամփի մեծ ճնշմանը, որը բազմիցս անձամբ քննադատել է Հերցոգին՝ պահանջելով, որ նա անմիջապես ներում շնորհի վարչապետին։

Նեթանյահուն Իսրայելի առաջին գործող վարչապետն է, որը դատարանի առաջ է կանգնել: Նա մշտապես հերքել է իր դեմ ուղղված մեղադրանքները` կապված կաշառակերության, խարդախության և վստահության չարաշահման հետ։

Վարչապետը պաշտոնապես ներում է խնդրել նոյեմբերին՝ պնդելով, որ դատավարությունը մասնատում է երկիրը և շեղում իրեն իր պարտականություններից։