Բազմաթիվ տարեցների և երեխաների տաքուկ «Օրրան»-ը 26 տարեկան է. համերգ, որը միավորել էր սերունդներին
2 րոպեի ընթերցում
Կամերային երաժշտության ազգային կենտրոնի բեմն ապրիլի 22-ին վերածվել էր սերունդների երկխոսության և համերաշխության հարթակի: «Օրրան»-ի մանկական եւ տարեցների երգչախմբերը հանդես եկան համատեղ համերգով՝ ներկայացնելով էստրադային և ազգային ստեղծագործություններ՝ հայերեն, անգլերեն և ֆրանսերեն։
«Արմենպրես»-ի հաղորդմամբ՝ «Երիտասարդ ձայներ, իմաստուն սրտեր» խորագրով համերգը նաեւ իրականություն դարձրեց «Օրրան»-ի հիմնադիր Արմինե Հովհաննիսյանի կողմից կազմակերպության 25-ամյակի միջոցառման ժամանակ տարեցների երգչախմբի 87-ամյա անդամ Աիդա տատիկին տրված խոստումը՝ վերաբացել երգչախումբը։
Արմինե Հովհաննիսյանը հավատացած է՝ նման նախաձեռնություններով տարեց շահառուներին ուրախություն են պարգևում, վերարժևորում նրանց կյանքն ու լցնում նոր իմաստով, տարեցներն էլ ի պատասխան իրենց են ուրախացնում, հուզում ու ջերմացնում։
Տարեցների երգչախումբը հիմնադրվել է 2012 թվականին, սակայն կորոնովիրուսի համավարակի պատճառով 2020 թվականին այն դադարեցրել էր գործունեությունը, ապա կրկին վերսկսել՝ հավատարիմ «Օրրան»-ի հիմնադրի խոստմանը: Խմբի անդամները 69-87 տարեկան են:
«Օրրան»-ի մանկական երգչախմբի ղեկավար Լուսինե Հակոբյանի և տարեցների երգչախմբի ղեկավար Սիլվա Կարապետյանի համատեղ ջանքերի շնորհիվ՝ «Օրրան»-ի 26-ամյակի երեկոն դարձավ յուրահատուկ երաժշտական կամուրջ՝ կապելով սերունդների տաղանդը, փորձառությունն ու երազանքները։
Միջոցառումը ևս մեկ անգամ ընդգծեց «Օրրան»-ի առաքելությունը՝ ստեղծել արժանապատիվ, հոգատար և աջակցող միջավայր կարիքի մեջ հայտնված երեխաների և տարեցների համար։