Արհեստական բանականությամբ գեներացված բովանդակությունը հեռարձակելիս պետք է մակնշվի․ ԱԺ-ն երկրորդ ընթերցմամբ ընդունեց նախագիծը
2 րոպեի ընթերցում
Տեսալսողական մեդիա ծառայություն մատուցող հեռարձակողները պարտավոր կլինեն արհեստական բանականությամբ կամ այլ թվային տեխնոլոգիական լուծումներով գեներացված բովանդակությունը հեռարձակելիս այն համապատասխան ձևով մակնշել։
«Արմենպրես»-ի հաղորդմամբ՝ համապատասխան նախագիծն Ազգային ժողովում երկրորդ ընթերցմամբ և ամբողջությամբ ընդունվել է՝ ձայների հետևյալ հարաբերականությամբ․ կողմ է քվեարկել 67, դեմ՝ 0, ձեռնպահ է մնացել 6 պատգամավոր։
Ավելի վաղ, Ազգային ժողովի արտահերթ նիստում «Տեսալսողական մեդիայի մասին» օրենքում լրացումներ նախատեսող նախագիծը ներկայացրել էր Բարձր տեխնոլոգիական արդյունաբերության նախարար Մխիթար Հայրապետյանը։
Նախարարը նշել էր, որ Կառավարության առաջարկած օրենսդրական փոփոխության հիմնական նպատակը սինթետիկ կամ արհեստական բանականությամբ ստեղծված հեռուստաբովանդակության նույնականացումն է՝ այն լսարանի համար հստակ տեսանելի դարձնելու միջոցով։
«Կառավարությունը օրենսդրական սույն նախագծով առաջարկում է մի քանի լրացումներ կատարել «Տեսալսողական մեդիայի մասին» օրենքում, որի հիմնական էությունը կայանում է նրանում, որ մենք հետայսու՝ օրենքի ընդունումից հետո, ակնկալելու ենք, որ տեսալսողական մեդիա ծառայություն մատուցող հեռարձակողները արհեստական բանականությամբ գեներացված կամ այլ թվային տեխնոլոգիական լուծումներով գեներացված հեռուստաբովանդակությունը կամ սինթետիկ բովանդակությունը հեռարձակելիս պարտադիր կերպով օրենքի իմպերատիվ պարտադրանքով մակնշեն»,- ասել էր Հայրապետյանը։
Նա պարզաբանել էր, որ խոսքը համապատասխան լեյբլինգի մասին է, որի միջոցով բովանդակության վրա հստակ տեսանելի կլինի, որ այն ստեղծվել է արհեստական բանականության գործիքակազմով։
Նախարարը մատնանշել էր, որ օրենքի ընդունումից հետո դրա կատարման նկատմամբ վերահսկողությունը և մոնիթորինգը իրականացնելու է Հեռուստատեսության և ռադիոյի հանձնաժողովը, իսկ խախտումների պարագայում կկիրառվի տուգանք՝ 300 հազար դրամի չափով։