2 րոպեի ընթերցում
Իրանը Մերձավոր Արևելքում իրադրության կարգավորման շուրջ երկարաժամկետ համաձայնության հասնելու համար պետք է տարածաշրջանի հարևան երկրներին փոխհատուցում տրամադրի նրանց տարածքներում գտնվող օբյեկտներին հասցված հարվածներից վնասի համար։ «Արմենպրես»-ի փոխանցմամբ՝ այս մասին հայտարարել է Արաբական Միացյալ Էմիրությունների նախագահի խորհրդական Անվար Գարգաշը։
«Եթե Իրանը նույնպես ցանկանում է չհարձակվելու շուրջ համաձայնագրի հասնել, ապա այդ համաձայնագիրը պետք է տարածվի բոլորի վրա։ Խոսքը ոչ միայն ԱՄՆ-ի և Իսրայելի կողմից Իրանի դեմ գործողությունների, այլև իր հարևանների դեմ Իրանի թշնամական գործողությունների մասին է։ Եվ երբ իրանցիները խոսում են փոխհատուցման մասին, դա աշխատում է նաև այստեղ», - ասել է նա Euronews հեռուստաալիքին տված հարցազրույցում։
Նա հավելել է, որ ԱՄԷ-ին է բաժին ընկել Իրանի կողմից արձակված հրթիռների և անօդաչուների ամենամեծ քանակը։
Գարգաշի խոսքով՝ ընթացիկ հակամարտությունը լուծելու համար հրադադարը բավարար չի լինի. կարևոր է վերացնել դրա հիմքում ընկած կառուցվածքային ռիսկերը։
«Մեր տեսանկյունից մենք չենք ցանկանում հետագա էսկալացում, բայց նաև չենք ցանկանում հրադադար, որը չի լուծի հիմնական խնդիրներից մի քանիսը, ինչը շատ ավելի վտանգավոր իրավիճակ կստեղծի տարածաշրջանում», - նշել է ԱՄԷ նախագահի խորհրդականը:
Նա ընդգծել է, որ իր երկիրը ցանկանում է վերջ դնել հակամարտությանը, «բայց դրա դադարեցումը չպետք է մշտական անկայունության» հանգեցնի Մերձավոր Արևելքում։
Ինչպես նշել է Գարգաշը, ԱՄՆ-ն «ԱՄԷ-ի գլխավոր գործընկերն է անվտանգության բնագավառում», և Աբու Դաբիում մտադիր են հետագայում ևս ամրապնդել Վաշինգտոնի հետ հարաբերությունները:
«Ամերիկայի դիրքորոշումը մեր (երկրին) աջակցելու և մեր հնարավորությունները հակաօդային պաշտպանության բնագավառում խթանելու հարցում եղել է բացառիկ», - ասել է նա:
Ավելի վաղ Իրանից հայտարարել էին, որ տարածաշրջանային երկրներում չպետք է լինի ամերիկյան ռազմական ներկայություն։